Գիտաբժշկական գրադարանում նշվեց Գիրք նվիրելու օրը

Առողջապահության ազգային ինստիտուտի (ԱԱԻ) նախաձեռնությամբ, փետրվարի 19-ին Գիտաբժշկական գրադարանում կայացավ Գիրք նվիրելու օրվան նվիրված հանդիպում, որին ներկա էին ՀՀ Առողջապահության նախարար Անահիտ Ավանեսյանը, փոխնախարարներ, ինչպես նաև ԱԱԻ ամբիոնի վարիչներ: Հանդիպման շրջանակում մասնակիցները խոսել են ԱԱԻ առաջիկա զարգացման հեռանկարների մասին։

ՀՀ Առողջապահության նախարար Անահիտ Ավանեսյանը կարևորել է սերունդների միջև փորձի փոխանակման դերը։  

 «Կարծում եմ, որ մենք պետք է ամեն ինչ անենք, որպեսզի Առողջապահության ազգային ինստիտուտը՝ որպես գիտա-ուսումնական ինստիտուտ, քայլառքայլ զարգանա՝ ո՛չ միայն Հայաստանի, այլ նաև փորձենք այն զարգացնել տարածաշրջանի մակարդակով, և մենք պետք է հնարավորին ամրապնդենք կապերը այլ հաստատությունների ու ուսումնա-գիտական կենտրոնների հետ»։

Տիկին Ավանեսյանը հիշեցրել է, որ ԱԱԻ-ն հիմնադրվել է 1963 թվականին, և այն տարբեր անվանումներ է ունեցել, ուստիև, տարբեր զարգացման փուլեր է անցել։

«Այստեղ որոշակի ժամանակահատվածում և՛ վերելքներ, և՛ անկումներ գրանցվել են, և ես ուրախությամբ եմ արձանագրում, որ վերջին երկու տարիներին, կարելի է ասել, որ ավելի շատ վերելքներ ենք ունեցել՝ամբիոնների թվաքանակի մեծացման, ինչպես նաև այս գեղեցիկ կենտրոնի ստեղծման առումով։ Հույս ունեմ, որ տեղի ունեցած փոփոխությունները խթան են՝ նոր նախաձեռնություններ իրականացնելու, քննարկումներ անցկացնելու, որոշակի շփումներ ապահովելու համար»։

ՀՀ ԱՆ նախարարը շեշտել է, որ 2020 թվականը եղել է շատ ծանր տարի։

«Ինչևէ թևակոխել ենք նոր տարի, ու պետք է փորձենք ինքներս մեզ հավաքել ու առաջ նայել։ Իհարկե, 2020-ին ինստիտուտը երկու կորուստ ունեցավ։ Մահացան ԱԱԻ-ի ամբիոնի վարիչներ Վլադիմիր Դավիդյանցը և Ալբերտ Ղազարյանը, որի համար ցավում ենք։ Դա ո՛չ միայն ինստիտուտի, այլ մեր բոլորի կորուստն է։

Վստահ եմ, որ նրանց թողած ժառանգությունը պետք է պահպանեն աշակերտները, և նրանց թողած սկզբունքներն ու արժեքները, գիտական ժառանգությունը պետք է ապրի ու զարգանա»։

Օրվա առիթով՝ նախարար Անահիտ Ավանեսյանը գիտաբժշական գրադարանին նվիրել է մեկդարյա պատմություն ունեցող բացառիկ հատորներ։

Եզրափակելով իր խոսքը՝ տիկին Ավանեսյանը հույս է հայտնել, որ նման հանդիպումները ԱԱԻ-ում կլինեն շարունակական։
Հետևելով օրվա խորհրդին, հանդիպման մասնակիցները մասնագիտական գրքեր են  նվիրել Գիտաբժշկական գրադարանին: ԱԱԻ տնօրեն Ալեքսանդր Բազարչյանը շնորհակալություն է հայտնել տիկին Ավանեսյանին` հանդիպմանը մասնակցելու համար, և գրադարանին հանձնել  ընտանեկան հավաքածուից մասնագիտական գրքեր՝ իր պապի և Լևոն Հովհաննիսյանի համատեղ հեղինակած թերապևտիկ բլոկի գրքեր, ինչպես  նաև ԱԱԻ ամբիոնների համար արժեքավոր այլ գրքեր։  

Հանդիպման ավարտին առողջապահության նախարարն ու ԱԱԻ տնօրենը գրադարանի բակում գիտելիքի  ու դպրության խորհրդանշական ծառ տնկեցին:

Հարցեր, պատասխաններ, մեկնաբանություններ